Yaznıñ başında yağmurlar neticesinde suv basqan Alupkadaki Vorontsov saray-müzeyinde eki sergi salonı ziyaretke qapatıla. Bu aqta müzeyniñ saytında haber etile.
Matbuat hızmetiniñ malümatına köre, ekinci qattaki Şuvalovskiy korpusınıñ «Professor V.N.Golubevniñ bahşışı» sergisi ve «Pod platanom» sergi salonı oktâbrniñ 15-ne qadar ziyaretke qapalı olacaq.
Müzeyde tehnikiy sebepler bar, dep bildireler, amma olarnı aydınlatmaylar.
Daa evel haber etilgeni kibi, qasırğa yeli Vorontsov sarayınıñ vaqtınca töşelgen damını qoparıp aldı. Neticede yağmur birinci ve ekinci qattaki odalarnı bastı. Müzey memuriyeti saraynıñ parad salonlarını bir qaç künge ziyaretke qapatqan edi.
