Rusiye kontrolindeki Qırım akimiyeti yarımadada içme suvu yedekleriniñ fevqulâde vaziyetini inkâr ete. Qırımnıñ Rusiye suv hocalığı devlet komitetiniñ yolbaşçısı İgor Vayl, suv kurort mevsimine yetecek, dep işandıra.
Bu aqta o, fevralniñ 6-nda Aqmescitteki brifingde ayttı.
Vaylniñ malümatına köre, bugün gece Aqmescitni suvnen temin etken suv anbarlarında 732 biñ metr kub suv çıqtı, yanvar boyunca olğanından 140 biñ çoq oldı.
«Tünevin matbuatta olğan ajiotajdan soñ Aqmescitni temin etken bütün suv anbarlarına eki gece içinde 1,5 mln metr kub suv keldi, dep aytmağa isteyim. Bugünki künde iş stabil, suv resurslarınen bir qorqu yoq», – dep bildire Vaylniñ aytqanlarını «Krıminform» saytı.
Onıñ qayd etkenine köre, «suv az olğanda yarımadanıñ suv resurslarını ratsional bir şekilde qullanmağa» kerek.
«Bugünki künde Qırım 132 mln kub metr suvnen temin etildi. Bu tek qızdıruv mevsimi içün degil – cumhuriyet reberligi bergen vazife – kelecek kurort mevsimine de yedek bar», – dep qoştı Vayl.
Fevralniñ 5-nde Moskva kontrolindeki Qırımnıñ suv hocalığı ve melioratsiya devlet komitetiniñ yolbaşçısı İgor Vaylniñ bildirgenine köre, Aqmescitte içme suvu eñ çoq 90-100 künge yeter.
Rusiye kontrolindeki Aqmescit memuriyetiniñ yolbaşçısı Yelena Protsenkonıñ haber etkenine köre, suvnı tutumlı qullanmaq içün aqmescitlilerge sıcaq suv tek raatlıq künleri berilecek.
Bundan soñ Qırım ükümetiniñ Rusiye yolbaşçısı Yuriy Gotsanükniñ aytqanına köre, Aqmescitte suv berilmesini sıñırlamağa acet yoq.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
