«Suspilne radio» bazarertesi künü, mayısnıñ 17-nde, «Ukrayınske radio Krım» yañı informatsion leyhasını başlata. Onıñ hususiyeti qırımtatar tilinde çıqacaq haber-eglence şousı olacaqtır. Bu aqta «Suspilne» matbuat hızmeti Qırım.Aqiqatqa bildirdi.
«Artıq tolusınen qırımtatar tilinde olacaq haber-eglence şousı umummilliy radio yayınında çıqacaq. Bu aynı vaqıtta tok-şou alâmetli eglence ve maarif programması olacaqtır. Böylece qırımtatar mevzularını umumukrain informatsion alanına kirsetemiz. Demokratik cemiyet qurmağa ve milliy menfaatlarımıznı qorumağa istesek, bu em Ukrainanıñ farqlı köşelerinde yaşağan qırımtatarlar, em de ukrainler içün pek müim ola», – dep ayttı radio platformasından mesüliyetli olğan Ukraina milliy cemaat teleradiokompaniyasınıñ idare azası Dmıtro Horkin.
Qayd etilgenine köre, mayısnıñ 21-nde yayınlanacaq qırımtatar tok-şounıñ birinci programınıñ musafirleri Ukraina siyasetçisi, Qırımtatar Milliy Meclisiniñ reisi Refat Çubarov ve qırımtatar oyuncısı, stsenarist ve stendap-kömik Suleyman Umerov olacaqlar.
«Ukrayınske radio Krım» aftada beş kere, bazarertesinden cumağa qadar, Kyiv saatı ile 19:10-dan 20:00-ğa qadar yayınlanacaq. Yayın bir qaç programdan ibaret olacaq: Qırımdan köçip kelgenler aqqında, yarımadadaki adise-vaqialar aqqında «Qırım – Ukrainadır» informatsion-analitik programı, jurnalist Muslim Umerov alıp baracaq qırımtatar tilinde eglenceli şou.
Programnıñ video versiyası olacaq ve UA: Ukrayınske radio YouTube kanalında yayınlanacaq.
Matbuat hızmeti bildirgenine köre, leyha Ukrainanıñ cenübinde ve Qırım yarımadasınıñ bir qısmında Ukrain radiosınıñ 100,7 FM dalğalarında ve 549 AM sıqlıqta orta dalğalı diapazonda çalacaqtır. Matbuat hızmeti, Qırım köyleriniñ 100%-ını ve şeerleriniñ 95%-ını ve aqşam üstü Ukrainanıñ aman-aman bütün yerlerini qaplap alacaq.
Hatırlatamız, mayıs ayında Qırım.Aqiqat Radiosında Aleksandr Yankovskiy ile «Qırım meselesi» tok-şousı başlatıldı. Program NED desteginen «Qırım cemiyetleriniñ radiosı» leyhası çerçivesinde azırlana.
Rusiye kontrol etken Ukraina topraqlarında Ukraina kütleviy haber vastalarınıñ yayınları toqtatıldı – işğal altındaki Qırımda ve işğal etilgen Donbas topraqlarında. Ukraina kütleviy haber vastaları Kyiv kontrol etmege topraqlarğa yayın yapmaq imkânlarını qıdıra.
