Ukrayınada Rusiye gruppirovkasını idare etken general Sergey Surovikin Rusiye Mudafaa naziri Sergey Şoyguğa Herson vilâyetinde ordunı Dnipronıñ sol tarafına çekmege teklif etti. Bu Hersonnıñ teslim etilüvi sayılacaq. Şoygu bu teklifke razı oldı. Bu aqta noyabrniñ 9-nda TASS Rusiye devlet haber agentligi bildire.
Surovikin Şoyguğa yapqan maruzasında Dnipronıñ sağ yalısında Rusiye gruppirovkasını temin etüv qıyınlıqları bar olğanına razı oldı. O, ordunıñ bir qısmı diger yönelişlerde qullanılacaq, dep tahmin ete. Surovikinniñ aytqanına köre, Dnipro boyu mudafaa bar.
Herson vilâyet şurasınıñ deputatı Sergey Hlan Rusiye arbiyleri Ukrayına Silâlı quvetleriniñ qarşı ücümini yavaşlatmaq içün noyabrniñ 9-nda Herson vilâyetinde bir qaç köpürni patlattı, dep bildirdi.
Noyabrniñ 3-nde Rusiye işğalci quvetleri Hersondaki blokpostlarnı alıp taşladı. Herson vilâyetiniñ arbiy memuriyet yolbaşçısı Yaroslav Yanuşeviçniñ fikirince, bunı şeerden çıquvnı köstermek içün yapqanlar.
O künü haber etilgenine köre, işğal etilgen Hersonda Herson vilâyetiniñ devlet memuriyeti binasından Rusiye bayrağı alındı. Aynı vaqıtta, Ukrayına cenübi Mudafaa quvetleriniñ birleşken koordinatsion matbuat hızmetiniñ yolbaşçısı Natalâ Ğumenük bu provokatsiya ola bile, dep ayttı.
Noyabrniñ 7-nde Ukrayına Silâlı quvetleriniñ Baş ştabı bildirgenine köre, vatandaş urbasına kiyingen Rusiye arbiyleri Hersonda barışıqsever vatandaşlarnıñ evlerine kire ve soqaq uruşları içün yer pekiştire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
