Kreml ve Türkiye prezidentiniñ memuriyeti, Vladimir Putin ve Recep Tayyip Erdoğan Suriyeniñ şimal-ğarbindeki vaziyetni muzakere etmek içün Moskvada martnıñ 5-nde körüşecekler, dep tasdıqladılar, dep haber ete Azatlıq Radiosı. Bir qaç künden berli Türkiye ordusı Rusiye desteklegen prezident Başar Asadnıñ quvetlerinen çatışa.
Türkiye prezidenti Recep Tayyip Erdoğannıñ bazarertesi künü bildirgenine köre, o, Putin ile keçirilecek muzakereler neticesinde Suriyeniñ İdlib vilâyetinde ateş toqtatıluvı aqqında añlaşacaqlar, dep ümüt ete.
Putinniñ matbuat kâtibi Dmitriy Peskov, Moskva «Türkiye ortaqlarınen işbirligine büyük emiyet bere», amma olacaq muzakerelerde Putinniñ fikri «deñişmeycek», dep ayttı.
9 yıldan berli devam etken Suriye zıddiyetinde Rusiye Asadqa, Türkiye oña qarşı çıqqan silâlı muhalifetke qoltuta. 2018 senesi Putin ve Erdoğan Soçide tizgen añlaşmalarğa köre, Türkiye ve Rusiye Suriyeniñ şimal-ğarbindeki İdlib vilâyetinde barışıqnı kefil etti. Faqat Asadnıñ ordusı ücüm etip, muhalifetten topraqlarnı aldı. Türkiye közetüv noqtaları darbege oğradı. Bundan soñ Türkiye İdlibke qoşma küçlerini kirsetip, Suriye ükümet ordusına qarşı darbe endirip başladı.
Suriyeniñ şimal-ğarbindeki deşetli uruşlar soñki künleri devam ete. Keçken künü Türkiye arbiy ava quvetleri Suriyeniñ eki Su-24 uçağını tüşürdi. Bundan soñ Rusiye, Suriye üzerinde Türkiye uçaqları içün telükesizlikni kefil etip olamay, dep bildirdi.
Fevral ayında resmiy malümatqa köre Suriyede 50-den çoq Türkiye askeri elâk oldı. Türkiye, cevap olaraq atılğan ateş neticesinde Asad ordusınıñ yüzlernen askeri öldürildi, dep bildire. Qayd etilgenine köre, Türkiye Rusiye arbiylerinen çatışmamağa çağıra.
Bazarertesi künü berilgen malümatqa köre, Asadnıñ ordusı Dimaşq-Aleppo yolundaki Sarakib şeerini kene aldı. O, endi bir qaç kere el-elden keçken edi.
