Sentâbrniñ 28-nde saba Rusiyeniñ Sumı şeerindeki hastahanege çift ücümi neticesinde, soñki malümatqa köre, doquz kişi elâk oldı, 12 insan yaralandı, dep bildirdi vilâyetniñ arbiy memuriyeti.
Ukrayina Silâlı quvetleriniñ ava küçleriniñ malümatına köre, sentâbrniñ 28-nde saba Rusiye arbiyleri Sumı şeerindeki hastahanelerge «Şahed» dronlarınen eki kere ücüm etti.
Ukrayina İç işler naziri İğor Klımenko ilk olaraq altı adamnıñ ölümi aqqında haber etti, olarnıñ arasında bir polis hadimi bar. Onıñ aytqanına köre, birinci ücümden soñ hastahane tahliye etildi, vaqia yerine qurtarıcılar ve polis keldi, soñra rus arbiyleri ekinci kere ücüm ettiler.
Ukrayina Sağlıq nazirligi bildirgenine köre, yaralanğanlar arasında – eki tibbiy hadim: ekim ve emşire.
«Hastahaneniñ qabul bölügi yıqıldı, qatlardan biri ve bina damı qısmen yıqıldı», – dep bildirdi Sağlıq nazirligi.
Sumı vilâyetiniñ arbiy memuriyet yolbaşçısı bildirgenine köre, Rusiye quvetleri «Shahed» uçucısızlarınen Sumı şeerine üç aviatsiya darbesini endirdi. Onıñ aytqanına köre, eki hastahane ve yaqın olğan çoq qatlı evler zarar kördi.
Rusiye küçleri daima çeşit türlü silâ qullana – ücüm uçucısız, raketa, tüzetilgen ava bombaları, toplu ateş reaktiv sisteması – Ukrayina regionlarına ücüm eteler.
Rusiye reberligi Rusiye ordusı Ukrayina şeer ve köyleriniñ vatandaş infrastrukturasına maqsatlı ücümler yapqanını, sakinlerni öldürgenini ve hastahane, mektep, bala bağçaları, energetika ve suv teminatı obyektlerini yıqqanını inkâr ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
