Rusiye mahkemesi tarafından 12 yıl apis cezasına mahküm etilgen vatandaş jurnalisti Amet Suleymanovnı Bağçasaray Muvaqqat tutuv izolâtorına alıp ketkenler. Bunı ömür arqadaşı Lilâ Lümanova bildirdi. Bundan evel, o, yürek hastalığı sebebinden ev apsinde edi.
"Onı qayerge alıp ketesiñiz sualime başta Bağçasaray Muvaqqat tutuv izolâtorına, soñra Aqmescit MTİ, soñrası ise nasıldır vesiqalar kelgen soñ belli olacaq, dediler", -dedi o.
Qadın yaqalavnıñ nasıl olıp keçkeni aqqında da aytıp berdi. Onıñ sözlerine köre, Rusiye quvetçileri Suleymanovnıñ evine aprelniñ 5-nde kelgen.
"Şimdi Ramazan ayıdır ve biz oraza tutamız, bunıñ içün aşamq içün eñ 20 daqqa bermelerini istedim. Yanına qoyuñız, anda aşar, dediler", - dep qoştı Lümanova.
Fevralniñ 10-nda Rusiyeniñ Vlasiha İstinaf mahkemesi şikâyetni red etip, vatandaş jurnalisti Amet Suleymanov, Rustem Seytmemetov, Seytumer ve Osman Seytumerov ağa-qardaşına qarşı Rostov-na-Donu Cenübiy bölgeniñ arbiy mahkemesiniñ qararını quvette qaldırdı.
Amet Suleymanov yüreginiñ arterial ve mitral yetersizligini çeke, onıñ yürek klapanınıñ deñiştirilmesi içün acele ameliyatqa ihtiyacı bar.
Mudafaa tarafı, esnas devamında Amet Suleymanovnıñ sağlı vaziyeti sebebinden böyle bir apis tedbirini qullanmaq mümkün olmağanını añlatmaq tırıştı.
Onıñ imayecisi Lilâ Gemeci ükümni öldürici dep saya: "Onı ölümge mahküm ettiler. Böyle diagnoz ile adamnıñ apis etilmesi tsinizmdir".
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
