Sudaqta Rusiye polisi qırımtatar faali Refat Kamilovnıñ evine kelgen. “Qırım birdemligi” haber etkenine köre, o, 2019 senesi iyül ayında Moskvağa qırımtatarlarnıñ davaları boyunca istinaf mahkemege barğan edi ve Moskva polisi tarafından yaqalanğan edi.
Faalge qarşı memuriy protokol tizildi. Biraz soñra, mahkemede dava materialları baqılğan soñ oña cöreme yazıp berdiler. Bu munasebet ile evel qanun qoruyıcı organlarınıñ hadimleri oña endi kelgen ediler, amma dekabrniñ 21-nde olar kene keldi.
“Dekabrniñ 21-nde maña polis hadimleri keldi. Malümatımnı yazıp gizli yaşağanlarnı qıdıralar, dep ayttılar. Qomşumda gizli yaşağanlar barmı, çalışalarmı, dep meraqlandılar. Bunen ne içün maña kelgenlerini añlamayım. Ekinci sefer endi. İlk sefer Moskvağa makemede öz vatandaşlarıma qoltutmaq içün ketkende olğan edi, meni tutıp aldılar. Cinayetçige kelgenler, ğaliba. Ketip tınç narazılıq bildirmege menim aqqım. Elbette buna pek açuvlandım. Kelip ne içün soraştıralar añlap olamayım. Ayrı psihologik basqı yapalar”, – aytıp berdi faal.
Rusiye polisiniñ Kamilovnıñ evine ziyaret etmesi ile bağlı açıq tefsirleri yoq.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
