Rusiye tahqiqatçıları Sudaqta eki yaşında qızçıqnıñ vefatınen bağlı teşkerüv başlattı. Bu aqta Qırım ve Aqyardaki Rusiye Tahqiqat komitetiniñ Tahqiqat idaresiniñ reber yardımcısı Olga Postnova «Krıminform» neşirine bildirdi.
«Müessise bala ölümini teşkerip, adiseniñ bütün tafsilâtlarını tedqiq ete», – dep ayttı Tahqiqat komitetiniñ vekili.
Sudaqnıñ Taraq Taş (Daçnoye) köy sakini Elzara Osmanova eki yaşında qızı vefat etkenini içtimaiy ağlarda bildirdi. «2020 senesi noyabrniñ 6-nda saat 21.39-da Sudaqnıñ şeer hastahanesinde eki yaşında qızım can berdi, – dep yazdı o. – Tibbiy ölüm vesiqasında qayd etilgenine köre, o, belli olmağan pnevmoniya neticesindeki endotoksik şoktan vefat etti».
Vefat etken qıznıñ anası aytqanına köre, balanıñ diagnozı vaqtında qoyulmadı ve kerekli yardım kösterilmedi. Qadın, Taraq Taş köyüniñ ambulatoriyasına muracaat etken edi, anda keskin nefes virus yuqunçı diagnozı qoyuldı, amma qızçıqnıñ alı fenalaşmağa devam etti. Ana şeer hastahanesine barmağa qarar aldı, anda ekimler ilâc berip, olarnı evge yolladı. O künü balanıñ alı fenalaştı vve anası tekrar hastahanege muracaat etti, anda bala vefat etti.
Can bergen qızçıqnıñ anası bildirgenine köre, Sudaqnıñ şeer hastahanesinde bala bölügi qapatıldı.
Hastahane hadimleri bala ölümini açıq sürette izaatlamay.
Daa evel Kefede pansionat müdirine para cezası berildi. O, bala ölüminiñ sebebi olğan ekimni işke aldı.
