İlhaq etilgen Qırımda Çelebi Eli-Tat-Kara-Sudaq dört yolaqlı trassasınıñ qısmınıñ qurucılığı başlandı, bunıñ neticesinde Qırım ormanınıñ aman-aman sekiz gektarı yoq etilecek, dep tarif etti Qırım.Aqiqatqa yerli bir ülkeşınas.
Onıñ aytqanına köre, Rusiyeniñ orman hocalığı federal agentligi "Çelebi Eli-Tat-Kara-Sudaq" avtomobil yolunıñ qurucılığı ve rekonstruktsiyası" obyektiniñ planlaştıruvı boyunca vesiqalarnı qabul etti.
"Qırımnıñ Ekologiya ve tabiat resursları nazirliginde bildirdiler ki, avtomobil yolunıñ qurulması içün alınğan Tat-Kara bölük ormancılığı, Eski Qırım ormancılığı ve Sudaq ormancılığınıñ Komsomol bölük ormancılığı ormanlarınıñ umumiy meydanlığı 7,7307 ga teşkil ete", —dep bildirid ekspert.
Ülkeşınasnıñ malümatına köre, qurucılar Tat-Kara havuzından suvnı faal qullanalar. Ülkeşınas şunı da qayd etti ki, "Tavrida" trassasınıñ qurucılığı vaqtında ormanlar yoq etilgen soñ, olarnı ğayrıdan tiklemediler.
Yañı yol, "Tavrida" trassasından yalığa üç çıqıştan biridir. Leyhanıñ fiyatı tahminen 24 milliard ruble. Tat-Kara yanından Sudaqqa doğru yolnıñ dört yolaqlı qısmı qurula. İşlerni 2027 senesine qadar bitirmege planlaştıralar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
