Cumaaqşamı künü, noyabrniñ 7-nde, Kreml kontrolindeki Sudaqnıñ Mirovoy mahkemesi sentâbrniñ 27-nde Rusiye quvetçileri evini tintken yerli faal İlver Ametovğa para cezasını bermege qarar aldı.
Bu aqta advokat Lenura Yengulatova Qırım.Aqiqatqa haber etti.
«Ondan alınğan silâ sebebinden degil, bergi beyannamesi sebebinden oturışuv oldı. 300 ruble para cezası berildi. O, razı oldı: beyannamede kerçekten hata bar edi. Amma kene de beyannameni muasebeciler bergi hızmetine yollağan edi, olar ise bir şey almağanını bildire», – dedi Yengulatova.
Onıñ aytqanına köre, bu «faallerge yapılğan basqı şekillerinden biri ola bile».
Qırım.Aqiqatta olğan mahkeme celpnamesinde İlver Ametov Rusiye Memuriy cinayetler kodeksiniñ 15.5 maddesine istinaden (bergi beyannamesini berüv müddetini bozuv) qabaatlana, dep aytıla.
Aynı vaqıtta, advokatnıñ aytqanına köre, Rusiye quvetçileri faalniñ eski silânı toplav litsenziyası bozulğanını baqa bile.
Sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ reisi Refat Çubarov bir qaç on silâlı Rusiye quvetçisi İlver Ametovnıñ evini blok etti, dep bildirgen edi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Sudaqtaki tintüvlerden soñ Ametovnıñ Qırımtatar Milliy Meclisiniñ aza şeadetnamesi, müzey eksponatları, bazı vesiqalar «ekspertizağa» alındı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Rusiye quvetçileri İlver Ametovnıñ evini endi tintken edi. Birinci tintüv 2015 senesi dekabr ayında, o, hastahanede olğanda, keçirilgen edi. Sebebi belli degil. 2017 senesi mayısında quvetçiler tekrar kelip, oğlunı tuttı.
