Qırımtatar faali ve din adamı Ridvan Umerov mayısnıñ 19-nda Rusiye kontrolindeki Sudaq şeer mahkemesiniñ «çaqmama davasında» qabaatını tanımadı. Bu aqta «Qırım birdemligi» cemaat birleşmesi advokat Marlen Halikovnıñ malümatına esaslanıp bildirdi.
Oturışuvda imaye tarafınıñ şaatı olaraq Lilâ Yadgarova sorğuğa çekildi, o, Ridvan Umerov yazışqanında qabaatlanğan Umicon Dadaconovnıñ doğmuş qardaşı ola. O, Rusiye Ceza kodeksiniñ 205.6 maddesine istinaden («Cinayet aqqında haber etmeme») qabaatlana. Advokat Marlen Halikovnıñ bildirgenine köre, qadın soñki sefer 2014 senesi Umicon Dadaconov ile bağğa çıqqanını ayttı. Onıñ bildirgenine köre, o, esas Ukrainağa para qazanmağa ketti, soñra Türkiyege anasına ketti, amma onıñnen körüşmedi bile, 2015 senesinden berli Dadaconov ile bağlanıp olamaylar.
Yadgarovanıñ mahkemede bildirgenine köre, onı er yıl FSB bölügine sorğuğa çağıralar. Bıltır böyle körüşüvlerden birinde uquq qoruyıcı organlarınıñ hadimleri ile resmiy olmağan subet vaqtında ağası 2015 senesi Mosulda elâk olğanını bildi.
Nevbetteki mahkeme oturışuvı mayısnıñ 27-ne belgilendi, taraflarnıñ munaqaşaları beklenile.
Kreml kontrolindeki Sudaq şeer mahkemesi fevralniñ 15-nde «cinayet aqqında haber etmegeninde» qabaatlanğan (Rusiye Ceza kodeksiniñ 205.6 maddesi) qırımtatar faali ve din adamı Ridvan Umerovnıñ davasını temelden baqıp başladı. FSB tahqiqatçısı Valeriy Şerstükovnıñ bildirgenine köre, 2015 senesi «VKontakte» içtimaiy ağında Umerov Umicon Dadaconovnen yazışqan edi. FSB ise Dadaconov «IŞİD teşkilâtınıñ faaliyetinde iştirak etti», dep bildire.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
