Sudaq yanında qadın ve üç bala ile yengil maşna endekke avdarıldı. Bu aqta Rusiye FVN-niñ Qırım idaresiniñ matbuat hızmetine esaslanıp, "RİA Krım" haber agentligi bildirmekte.
Müessisede aytıp bergenlerine köre, yol qazası tünevin kündüz Sudaq - Qoz (Solneçnaya Dolina) maşna yolunda oldı. FİAT maşnasınıñ aydavcısı dümen kontrolini baş etip olamadı.
Acele yardım taqımı aydavcını Sudaq şeer hastahenesine alıp ketti, altı, doquz ve on bir yaşındaki balalarnı ve olarnıñ anasını ise yerli travmatologok bölugine ketirdiler, denile beyanatta.
Bağçasaray rayonınıñ Bazarçıq (Poçtovoye) köyünde iyül 25-inde demiryol üzerindeki köpürde üç yengil maşna çatıştı. Yaralanğanlarnıñ arasında balalar bar edi.
Qırımlı qurtarıcılarnıñ bildirgenine köre, Qırımda ciddiy yol qazalarınıñ sayısı arttı. Qırımda 2019 senesiniñ birinci üç ayında keçken yılğa baqqanda bir buçuq qat ziyade aydavcı mesüliyetke çekildi.
