İşğal etilgen Qırımda Rusiyeniñ büyük arbiy talimleri devam ete – sentâbrniñ 26-nda talimler Sudaqta keçirile. Şeer soqaqlarında blokpostlar açıldı, uquq qoruyıcılar er bir maşinanı baqa, dep haber ete yerli kütleviy haber vastaları ve Telegram kanalları.
«Yük naqliyatına ayrı diqqat berile. Vesiqalar ve maşina içleri teşkerile», – dep qayd ete «Vesti Krım» telekanalı.
Aluştada sabadan berli yollarda Rusiye arbiyleri çoq, çaprazlarda tayama noqtaları ve blokpostlar donatıldı, dep qayd ete «Krımskiy veter» Telegram kanalı. Şeerniñ Rusiye memuriyet yolbaşçısı Galina Ogneva da köründi.
Sentâbrniñ 26-nda Yaltada talimler keçirilecek. Şeerniñ Rusiye memuriyeti küçlü sesler ola bile, dep tenbiledi.
Qırımnıñ Rusiye yolbaşçısı Sergey Aksenov sentâbrniñ 17-nden başlap yarımadada «territorial mudafaa bölükleriniñ» talimleri keçirilecek, dep bildirgen edi. Onıñ aytqanına köre, talimlerniñ maqsadı «duşmannıñ diversion gruppalarına cumhuriyetke kirmesine mania olmaqtır».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
