Sudaqta keçken "Tavrida-ART" rusiye festivaliniñ qapaluvında yanğın çıqtı. Tedbir teşkilcileri bildirgenine köre, festival meydançığı yanında quru ot yanıp başladı, yanğın sebebi ise fişenk edi.
"Mesül adamlar, fişenkler şousı vaqtında, salütlar yiberilgen yerde quru ot yanıp başlamasına yol berdi. Adise, festilal meydançığınıñ tışında edi ve tedbir seyircileri içün telüke olmadı", – yaza tedbir teşkilcilerniñ sözlerinde "Krıminform".
Fişenkni, Rusiye icracısı Leonid Agutin çıqışını bitergen soñ ateşlettiler. Yanğınnı ise "Leningrad" taqımı yırlağanda, söndüre ediler.
Rusiye FVN-niñ Qırım idaresiniñ matbuat hızmetine köre, ateşni 10 daqqada söndürdiler.
"Fişenkni festival yeriniñ tışında ateşlete ediler, kelgen adamlar içün iç telüke yoq edi. Fişenk şousını teşkil etken yuridik şahısnı memuriy mesuliyetke çekecekmiz", – denile beyanatta.
Daa evel Sudaqta kecken "Tavrida-ART" Rusiye gençler festivalinde avgustnıñ 24-ünde arbiy uçaqlar ve vertolötlar iştiraginen ava kösterişi kösterilecek edi.
Festival saytında yazılğanı kibi, "Tavrida - Art" - Rusiyede ilk icadiy topluluqlarnıñ festivalidir. Onıñ ğayesi "Tavrida" forumınıñ mezunlarında peyda oldı.
