Sudaq sakinleri mahkeme binaları yanında tutulğan qırımtatar faalleriniñ memuriy cöremelerini ödemek marafonğa qoşuldılar ve pullar berip başladılar. Bunı Qırım.Aqiqatqa «Qırım birdemligi» cemaat birleşmesi bildirdi.
Haber etile ki, Sudak sakinleri «Qırım birdemligi»ne 10 rublelik pullarnen fotoresim yollağanlar. Olar, insanlarnıñ para toplağan ve para cezalarını ödegen bir marafonnıñ iştirakçileri oldılar.
Evel bir çoq adam, oktâbrniñ 4, oktâbrniñ 11, oktâbrniñ 25, noyabrniñ 1 ve noyabrniñ 23 adiselerinden soñ «sanitar qaidelerni» ve «kütleviy tedbirler vaqtında özüni tutuv qaidelerini» bozğanlarına köre 1 biñ ve 25 biñ ruble arasında mumuriy cöremeler alğan ediler.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
