Dekabrniñ 21-nde Sudaqta Rusiye quvetçileri üç qırımtatar faaliniñ evine keldiler – Bekir Müslimov, Seytosman Karaliyev ve Nariman Muyedinov. Bu aqta “Qırım birdemligi” haber ete.
Aq-uquq qoruyıcılarğa Bekir Müslimovnıñ aytıp bergenine köre, evine işğal polisi, koronavirusnen hasta olıp hastahaneden qaçqan Özbeksitan vatandaşını tapmaq maqsadınen kelgenler.
“Evimizge polis hadimleri keldi. Evde yoq edim. Evge qaytqanda, apayım, polisler kelgenini ayttı. Onıñ sözlerine köre, olar özüni tanıştırdılar. Olardan biri kiçik leytenant edi, soyadı Polânskiy bellesem, tam olaraq hatırlamayım. Özbekistan vatandaşı olğan Ayder Aliyevni qıdıralar dep ayttılar. COVID-19ğa tasdıqlanılğan testnen hastahaneden qaçqan ve anda bulunıp menim adresimni qayd etken. Apayım, polis hadimlerine, onı iç bir vaqıt körmegenini ayttı. Olar, Ayder Aliyev bu adres boyunca yaşamay ve yaşamağanını, ve iç bir vaqıt resmiyleştirmegeni aqqında apayımnıñ şahsiy malümatınen izaatnameni yazdılar. O imzaladı, olar da kettiler”, – haber etti Bekir Müslimov.
Cemaat imayeci Seytosman Karaliyevge polis hadimleri “muzakerenen” kelgenler.
“Tünevin üyle vaqtında evimizge polis hadimleri keldi. Selâmlaşıp rayonımızda hırsızlıq olğan eken tarif ettiler ve cumaertesi künden bazar kününe qadar evde olıp belki bir şeyni eşitken edik soraştıra ediler. Qomşularımıznıñ episini soraştıracaqlar dep qoştılar. Er şey olğanı kibi olğan edi, bir şeyni körmedik, bir şeyni eşitmedik dep ayttım. Soñ şahsiy malümatımnı, telefonımnı sorap yazdılar. Aqayımnıñ malümatını ve evimizde daa kim yaşay dep sordılar. Aqayımnen ve çağına yetmegen dört balamnen yaşağanımnı ayttım. Onıñ malümatnı yazıp kettiler”, – aytıp berdi Seytosmannıñ apayı Elzara Karaliyeva.
Nariman Muyedinovnıñ evine polis hadimleri qırsızlanğan maşina aqqında sorap kelgenler.
“Polis hadimleri özüni tanıtmadı. Raatlıq künleri bizim bölgemizde qırsızlanğan maşina aqqında bir şeyler bilemmi, dep soradılar. İç bir şey eşitmedim, iç bir şey körmedim dedim. Adım, soyadımı, doğru adresimni yazıp kettiler”, – aytıp berdi Nariman.
Rusiye polisiniñ qırımtatar faalleriniñ evlerine ziyaret etmesi ile bağlı açıq tefsirleri yoq.
“Qırım birdemliginiñ” malümatına köre, Rusiye quvetçileriniñ ziyaretleri aqqında endi 30-ğa yaqın kişi aytıp bergen.
Evel, dekabrniñ 21-nde Sudaqta Rusiye polisi qırımtatar faali Refat Kamilovnıñ evine kelgen edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
