Qırımda Sudaq sakini içtimaiy ağlarda izaat qaldırğanı içün Rusiye ordusını «itibardan tüşürüv» maddesine istinade 30 biñ ruble para cezasını aldı. Bu aqta Qırımdaki Rusiye İç işler nazirliginiñ idaresi haber ete.
«Sudaqnıñ 40 yaşında bir qadın sakini içtimaiy ağda Rusiye Federatsiyası Silâlı Quvetlerini itibardan tüşürgen izaatlar qaldırğan edi. Oña qarşı Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına istinaden (Rusiye Federatsiyası Silâlı Quvetlerini itibardan tüşürgen açıq areketler) memuriy protokol tizildi», – dep haber ete müessise.
Qadınnıñ adı ve soyadı aytılmay, bu vaziyetnen bağlı fikri belli degil.
2022 senesi martnıñ 4-nde Rusiye deputatları «Rusiye Federatsiyası Silâlı quvetlerini itibardan tüşürüv» içün memuriy ve cinaiy mesüliyet belgilegen Rusiye qanunlarına kirsetilecek tüzetüvlerni qabul etti. O künden berli Rusiye bu qanunnı cenkke qarşı çıqqan ve Ukrayınağa qoltutqan insanlarnı taqip etmek içün qullana.
Martnıñ başında «KrımSOS» teşkilâtı bildirgenine köre, Rusiyeniñ Ukrayınağa qarşı büyük istilâsı başlağanından Qırımdaki Rusiye mahkemeleri Rusiye ordusını «itibardan tüşürüv» şübhesinen 612 qarar çıqardı.
Ukrayına prezidentiniñ Qırım Muhtar Cumhuriyetindeki temsilciligi mart ayında Qırımdaki Rusiye mahkemeleri yerli sakinlerge Rusiye Silâlı quvetlerini «itibardan tüşürüv» içün 20 million rubleden çoq para cezalarını berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
