Rusiye nezareti astındaki Sudaq şeer mahkemesi dekabrniñ 22-nde silânı qanunsız alıp saqlağanınen qabaatlanğan Sudaq regional meclisiniñ reisi İlver Ametovnıñ davasını qoşma tahqiq etüvge qaytarmamağa qarar aldı. Bu aqta Qırım. Aqiqat mühbiri haber etti.
Ametovnıñ advokatı Aleksey Rostovets aytıp bergenine köre, bugünki mahkeme oturışı vaqtında devlet qabaatınıñ vekili muracaatnıñ qanaatlendirüvine qarşı çıqıp, davanı qaytarmaq içün sebepler yoq, dep bildigen.
Bundan soñ mahkemeci Yelena Bosi qarar çıqarmaq içün mesleatlaşuv odasına ketken ve anda bir buçuq saat bulunğan. Muşavere odasından çıqıp qaranı ilân etti – muracaatnıñ qanaatlendirüvnde red etmek.
Aleksey Rostovetsniñ sözlerine köre, dekabrniñ 25-ne planlaştırılğan nevbetteki mahkeme oturışında mahkeme eşyaviy delilniñ tekrar ekspertizağa yollanmasını isteycek.
Rusiye kontrolindeki Sudaq şeer mahkemesi oktâbrniñ 29-nda silânı qanunsız alıp saqlağanında qabaatlanğan Sudaq regional meclisiniñ reisi İlver Ametovnıñ davası boyunca oturışuvnı «tehnik sebeplerden» başqa künge qaldırdı.
Oktâbr ayında Ametovnıñ dava oturışuvında ekspert-ballist sorğuğa çekilgen edi.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
