Link açıqlığı

Saatnıñ esas haberi

Sudaq mahkemesi Ayder Ablâkimovğa başqasını «çaqmağanı içün» 30 biñ ruble para cezasını berdi


Ayder Ablâkimov
Ayder Ablâkimov

Rusiye kontrolindeki Sudaq şeer mahkemesi Qırımdaki Rusiye Fevqulâde vaziyetler nazirliginiñ hadimi Ayder Ablâkimovnı «başqasını çaqmağanı» içün 30 biñ ruble para cezasına üküm etti.

Bu aqta «Qırım birdemligi» cemaat birleşmesi advokat Safiye Şabanovanıñ malümatına esaslanıp haber ete.

Rusiye FSBsiniñ versiyasına köre, Ayder Ablâkimov oña Yaqın Şarqta cenk areketlerinde iştirak etmege teklif etken Umicon Dadaconovnen yazışqanını bildirmedi.

Advokat Safiye Şabanovanıñ aytqanına köre, mahkeme davada olğan bir sıra zıddiyetni körmemezlikke urdı, hususan saifeniñ tahmin etilgen isyancığa ait olğanı isbatlanmadı, qabaatlav ekspertleri ise Dadaconovnıñ Ablâkimovnâ Iraqqa çağırmağanını ögrendi. Bundan ğayrı, qabaatlavnıñ esas delili Ablâkimovnıñ kelip qabaatlı olğanını aytması oldı, onı ise mahkemede qullanmağa mümkün degil edi, çünki müvekkili vesiqanı basqı altında imzaladı. Qabaatlanğan kişi qabaatını tanımadı.

«Bugün Rusiye Federatsiyasınıñ mahkeme sisteması bitkenini daa bir kere kördik ve bu mahkeme sistemasınıñ yañartıluvı aqqında qanun seviyesinde tüşünmeli. Çünki bugün bir-birine zıt kelgen deliller, bir-birine uymağan faktlar olğanda mahkeme üküm temeli olaraq prokurornıñ qabaatlayıcı qararını qabul etti ve öz ükmünde qabaatlayıcı qararnı bütünley kopiyaladı. Bir yıl devamında esnas taqlitini yapıp, tek ilk tahqiqat organları degil, mahkemeniñ de bir sıra bozuvları olğanda federal bücetten o qadar paranı ne kerek edi masraf etmege añlaşılmay», – dedi Şabanova.

Rusiye kontrolindeki Sudaq şeer mahkemesi mayısnıñ 28-nde qırımtatar faali Ridvan Umerovğa başqasını çaqmağanı içün 30 biñ ruble para cezasını berdi.

Buña oşağan qabaatlav boyunca Ayder Kadırov 30 biñ ruble para cezasını aldı.

2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.

Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.

Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.

XS
SM
MD
LG