Rusiye kontrolindeki Sudaq şeer mahkemesi oktâbrniñ 29-nda silânı qanunsız alıp saqlağanında qabaatlanğan Sudaq regional meclisiniñ reisi İlver Ametovnıñ davası boyunca oturışuvnı «tehnik sebeplerden» başqa künge qaldırdı.
Ametovnıñ advokatı Aleksey Rostovtsevniñ malümatına köre, «bu oturışuvda baqılacaq delil eşyalar ketirilmedi».
«Mahkeme, Sudaq politsiya bölüginiñ soraştıruv organına qarşı şahsiy qarar çıqardı. Mahkeme, noyabrniñ 24-nde olacaq nevbetteki oturışuvğa deliller ketirilecek, dep qarar çıqardı», – dep ayttı Ametovnıñ advokatı «Qırım birdemligi» cemaat birleşmesiniñ faallerine.
Oktâbr ayında Ametovnıñ dava oturışuvında ekspert-ballist sorğuğa çekilgen edi.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
