Sudaqta şeer iskelesi yanında qurtarıcılar, suvdan aqay cesedini çıqardı. Bunı Qırım FVN-niñ matbuat hızmeti bildire.
"Saat 8:15 (sentâbr 29-ında - QA) Sudaqta şeer iskelesi yanında 5 metr terenliginde aqay cesedi olğanı aqqında bildirüv keldi. Qurtarıcı dalıcılar, o yerge kelip, cesedni yalığa çıqardı", - denile beyanatta.
Bundan ğayrı, müessisege köre, sentâbr 29-ında Kezlevde (Yevpatoriya) de suv qazası oldı.
"Çayka" sanatoriyiniñ plâjı qarşısında 1941 senesi doğma aqay, deñizge kirdi ve yaramadı, yanında olğan adamlar onı suvdan çıqardı. Acele yardım hadimleri vaqia yerine kelgende, aqaynıñ ölümini qayd etti", - qoştılar müessisede.
Müessise malümatına köre, yılnıñ başından berli Qırımda 90 suv qazası oldı, 64 adam elâk oldı.
