Strasbourgda yanvarniñ 21-nde Avropa Şurası parlament assambleyasınıñ qış sessiyası başlana. Rusiye eyyeti anda iştirak etmeycek, dep bildire Radio Svoboda.
PACE yañlış malümat ve teşviqat şaraitlerinde kütleviy haber vastalarınıñ faaliyeti ve demokratik saylavlar içün kütleviy haber vastalarınıñ serbestliginen bağlı rezolütsiyalarğa rey bermege planlaştıra.
Yanvarniñ 24-nde munaqaşalarnıñ keçirilmesi planlaştırıla: «Rusiyeniñ Ukrainağa qarşı açıq istilâsı: barışıq esnasnıñ bozuluvı ve Avropa telükesizligi içün havf».
Tam kün tertibi bugün belgilenecektir.
Daa evel Rusiye eyyeti PACE yanvar sessiyasında iştirak etmek içün qayd olmaycaq, dep bildirilgen edi. Beyanatqa köre, bunıñ sebebi Rusiyeniñ PACEdeki vekâletleriniñ sıñırlanması oldı.
Avropa Şurası parlament assambleyası Rusiye eyyetini Rusiyeniñ Qırım işğalinden soñ rey berme aqqından marum qaldırdı. Moskva assambleyanıñ idariy qurulışlarında ve saylavlarnı nezaret etüvde iştirak etmek imkânlarından marum qaldı. 2017 senesi iyün ayında Rusiye PACEdeki eyyetiniñ vekâletleri ğayrıdan tiklengenine qadar Avropa şurasınıñ bücetine ücret tölemeycek. Moskvanıñ er yılki ücreti tahminen 33 million euro teşkil etti – teşkilât bücetiniñ aman-aman 10 fayızı.
2018 senesi oktâbr ayında Moskva teşkilâtqa şart qoydı: milliy eyyetlerni rey berüv aqqından marum qaldırmağa yasaq etken tüzetüv kirsetilmese, o, PACEge qaytmaycaq. Reglament deñiştirilmedi.
