Çarşenbe künü Rusiye ile olıp keçken aytışmalar qıyın edi, amma Ukraina ile bağlı ciddiy ve doğrudan fikir paylaşuv oldı. Bunı Rusiye-NATO Şurasınıñ oturışından soñ olıp keçken matbuat konferentsiyası vaqtında NATO baş kâtibi Yens Stoltenberg bildidri, dep haber ete Azatlıq Radiosı.
Onıñ sözlerine köre, taraflar arasında alâ da ciddiy fikir kelişamamazlıqlar bar ve olarğa umumiy yanaşmalar tapmaq qıyın meseledir. Amma aytışuvlar vaqtında esas suallerge toqunğanar. Stoltenberg bütün NATO ittifaqdaşlarınıñ ve Rusiyeniñ temsilcileriniñ bir masa başında olmasını müsbet işaret adlandırdı.
Yanvarnıñ 12-nde Brükselde olıp keçken körüşüv Rusiye-NATO Şurası çerçivesinde soñki eki yılda ilk oturış oldı. Aytışuvlar zamanı Rusiyeniñ yaqınlarda qoyğan "telükesizlik kefaleti" talaplarınıñ muzakeresi planlaştırıldı. Moskva, ilk nevbette NATO-nıñ daa da şarqqa keñleşmesine yol berilmemesi ve keçmiş sovet cumhuriyetlerden olğan memleketlerniñ, ilk nevbette Ukraiana ve Gürcistannıñ bu teşkilâtqa qabul etilmemesinde israr etti.
Çarşenbe künü keçirilgen körüşüvden soñ Yens Stoltenberg Alyansnıñ keñleşmesi tecavuziy adım olması ile bağlı bildirüv tamamınen aqiqatqa uyğun degil, dep ayttı.
"NATO esas printsiplerine kelgende uzlaşmaycaq. NATO ittifaqdaşları bugün Rusiyeni Gürcistan, Moldova ve Ukrainadan ordusını keri çekmege çağırdılar. Rusiyeniñ Ukrainanı NATO-ğa qubal etip etmemek qararına veto qoymaq aqqı yoqtır", - dedi o.
Yarın Rusiye ve OSCE temsilcileriniñ körüşüvi olıp keçecek, anda Ukraina delegatsiyası da iştirak etecek.
