NATO baş kâtibi Yens Stoltenberg, bağlaşım Ukrainağa teşkilâtnıñ azası olması içün kerekli miyarlarğa irişmege yardım ete, dep bildirdi. Bunı o, yanvarnıñ 10-nda Brükselde Avropa ve Avropaatlantik integratsiya meselelerinden vitse baş nazir Olga Stefanişanıñ iştiragi ile Ukraina-NATO Komissiyasınıñ oturışı başlamazdan evel bildirdi.
"NATO-nıñ standartlarına uyğun kelgen islâatlar ömürge keçirip, Ukrainağa NATO azalığına doğru ketmesine yardım etemiz. Ve biz açıq şekilde bildirdik ki, biz Avropada er bir milletniñ öz yolunı saylamaq aqqına, şu cümleden angi telükesizlik añlaşmalarğa qoşulmağa istegenine dair iç bir vaqıt uzlaşuvğa ketmemiz", - dedi baş kâtip.
Şunı da qayd etti ki, Ukrainanıñ azalıqnen bağlı qararnı özü ve NATO-daki itifaqdaşları berecek.
"Başqa iç kimseniñ bunıñ aqqında aytmaq aqqı yoq. Evel men Norveç baş naziri olaraq Rusiye ile aytıştım ve Rusiyenen añlaşmaq mümkün olğanını bilem. Biz bunı daa evel NATO köntekstinde de kördik - silâlar üzerinde nezaret ve diger saalarda. Şunıñ içün de biz barışıq siyasiy yol üzerinde çoq çalışamız ve bu yolnı sulh yolu ile al etmek içün Rusiye ile işbirlikni devam etmege azırmız", - dedi Stotenberg.
Aynı zamanda, onıñ fikrince, Ğarp Rusiyeniñ "kene işbirlik yerine silâlı quvetlerni qullanmağa, cebeleşüvni saylaycağına" azır olmalıdır.
Stefanişina öz nevbetinde "Rusiyeniñ ittifaqdaşlarına talaplarını aytışmalar kibi baqıla bilemeycegini añlamağa" çağırdı.
"Tecavuzcı, rus tankları Ukraina sıñırlarından uzaqlaşmağance şart qoyıp olmaz. Biz Rusiyeniñ Minsk-Normandiya formatı çerçivesinde vaziyetniñ tınç çezilmesi içün bir adım bile etmegenini cenk ile tehdit etip munaqaşanı qaldırmağa tırışqanını köremiz. Rusiyeniñ yapqanı aytışmalar masası başına qaytmaq yerine, öz kün tertibini qabul ettirmege ıntıluvdır", - dedi o.
Yanvarnıñ 9-nda Jenevada Strategik telükesizliig dialogı platformasında Amerika-Rusiye aytışmaları başlandı.
