İsveçiyanıñ paytahtı Stokgolmda UkrainaVision 2025 festivali başlandı, bu sene teşkilâtçılar işğal etilgen Qırımğa diqqat ayırdılar.
UkraineVision 2025 konferentsiyasınıñ birinci künü Qırım.Aqiqat muarriri Yelena Yürçenko Qırım jurnalistleri, Kremlniñ mabüsleri, aq qorçalayıcı teşkilâtlar tarafından siyasiy mabüsler olaraq tanılğanlar aqqında tarif etti.
Söz, Rusiye tarafından ilhaq etilgen Qırımda tutulğan Qırım.Aqiqat frilanseri Vladislav Yesipenko, maküm etilgen vatandaş jurnalisti İrına Danılovıç ve aq qorçalayıcılar tarafından siyasiy sebeplerden qabaatlanıp, uzun apis cezalarına mahküm etilgen qırımtatar faalleri, vatandaş jurnalistleri aqqında kete edi.
Yelena Yürçenko Yesipenko, Danılovıç ve vatandaş jurnalisti Server Mustafayevniñ misalinde Rusiye işğal etilgen Qırımda mustaqil jurnalistlerni nasıl taqip etkeni aqqında tarif etti.
Festival çerçivesinde "Dayanıqlıq ruhu: işğal şaraitlerinde ayat ve icad" ve "Qırım: tarih prizmasından kimlik" seminarları taqdim etildi, olarda aq qorçalayıcılar, jurnalistler, medeniyet ve sanat erbapları iştirak ete.
Hususan, seminarlarda Qırım tarihçısı ve jurnalisti Gülnara Abdullayeva, Qırım sakini, içtimaiy antropolog Olena Kulış, Qırım sakini, jurnalist, Qırım.Aqiqat muarriri Yelena Yürçenko iştirak eteler.
"Qırım Ukraina devletçiligi ve havfsızlığınıñ esas elementi olıp qala, ve onıñ işğalden azat etilmesi tek topraq bütünligi meselesi degil, aynı zamanda adalet meselesidir. Bugün, duşman Ukrayinanı bölmege, ümütsizlikni yaymağa ve dünyanı qanunsız ilhaqnı qabul etmege tırışqan vaqıtta, diqqatımıznı Qırımğa, azatlıq oğrunda küreşniñ timsali olaraq, celp etmek kerek. Ukrayinanı bölmege er angi ıntıluv istilâcınıñ qoluna oyun, ve tamam bu sebepten bizim birlik ve işğal etilgen topraqlarnı qaytaruv boyunca deñişmez mevamımız şübesiz olmalı", — dep qayd etti Qırım.Aqiqat içün bergen izaatında UkraineVision leyhasınıñ meneceri Yuliya Matusenko.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
