Ukrayina Yuqarı Radasınıñ spikeri Ruslan Stefançuk oktâbrniñ 24-nde Pragada ötkerilecek "Qırım platforması" ekinci Parlament sammitiniñ maqsatlarını bildirdi.
"Sammitniñ maqsadı, ilk nevbette, aşağıdaki meselelerde milliy ve halqara ğayretni birleştirmek ve koordinatsiya etmek: Qırım yarımadasınıñ işğalden azat etilmesi; Ukrayina topraq bütünliginiñ ğayrıdan tiklenilmesi; Ukrayinanıñ AB ve NATO-ğa ketken yolu; Ukrayina prezidenti Volodımır Zelenskıynıñ Sulh formulsınıñ ömürge keçirilmesi", - dep qayd etti Stefançuk.
Ukrayina parlamentiniñ spikeri Çehiya Cumhuriyetine resmiy ziyareti artıq başlanğanını bildirdi. Onıñ fikrince bu Ukrayina suvereniteti ve topraq bütünligine "küçlü" destektir.
Oktâbrniñ 24-nde Pragada ötkerilecek "Qırım platforması" ekinci Parlament sammitinde 70-ke yaqın çetel delegatsiya iştirak etecek, dep haber ettiler Ukrayina Yuqarı Radasınıñ matbuat hızmetinde.
2022 senesi oktâbrniñ 24-nde Horvatiyada "Qırım platforması" birinci Parlament sammiti öz işini başladı. Sammit eki kün devam etti. Birinci kün Qırımnıñ işğalden azat etilmesinden soñ reintegratsiyası meselelerine, keçüv adliye ve Rusiyeniñ halqara cinayetleri içün mesüliyetke çekilmesi aqqında munaqaşalarğa bağışlanğa edi.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
