Britaniya baş naziri Kier Starmer ve Frenkistan prezidenti Emmanuel Makron Ukrayina prezidenti Volodımır Zelenskıynen ABDge barıp, yañı barışıq planını taqdim ete bileler, dep yaza Daily Mail Britaniya neşiri.
Diplomatik menbalarnıñ neşirge haber etkenine köre, Starmer ve Makron kelecek afta Zelenskıynen beraber Washingtonğa barmağa azırlar.
ABD prezidenti Donald Trump NATOda liderlikten vazgeçüv imkânını baqıp, avropalı ittifaqdaşlar daa çoq telükesizlik mesüliyetini alsınlar, dep israr ete, dep bildire Mail.
Fevralniñ 28-yde Zelenskıy Trumpnen Beyaz sarayda körüşti. Taraflar ukrayin minerallarını qullanuv añlaşmasını imzalamağa planlaştırğan ediler, amma jurnalistler ögünde protokol tedbirinde qavğadan soñ Zelenskıy Beyaz saraynı erte terk etti, añlaşmanıñ imzalanması lâğu etildi.
Ukrayina prezidenti Londonğa ketip, anda memleketniñ baş naziri Kier Starmernen körüşti. Bundan soñ anda Avropa liderleriniñ sammiti keçirildi, Ukrayinağa qoltutuv muzakere etildi. Sammitten soñ Starmer Britaniya Frenkistan ve, belki de, «bir-eki iştirakçinen beraber» Ukrayinanen ateşkes planı üzerinde çalışacağını ayttı, soñra da bu plan ABDge taqdim etilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
