Büyük Britaniya baş naziri Kir Starmer, ABD-ne, Rusiyeniñ tekrar istilâsını toqtatmaq içün Ukrayinağa telükesizlik kefaletini bermege çağıruvını tekrarladı — bunı o, Amerika prezidenti Donald Tramp ile körüşüvden evel bildirdi, dep haber ete ğarbiy kütleviy haber vastaları.
BBC yazğanına köre, Vashingtongğa ketken vaqıtta Starmer, Büyük Britaniya ve ABD arasındaki munasebetler pekitilecek, dep ümüt etkenini bildirdi. Aynı zamanda o, ABD-den "saqlayıcılarğa" öz çağıruvını da tekrarladı.
Starmer, Ukrayina ve Avropanıñ ateş toqtatılmasına degil de, "devamlı barışıqqa" ihtiyacı bar, dep işandıra, bunıñ içün ise telükesizlik kefaleti kerek.
"Bunıñ nasıl olacağı, açıq-aydın, ciddiy muzakerelerniñ mevzusıdır. Biz öz rolümizni oynaycaqmız, ve men añlatqan edim ki, bizge ABD-den bir çeşit havfsızlıq mehanizmi kerek olacaq", — dep ayttı o.
Britaniya ükümetiniñ başı, telükesizlik mehanizmleri olmağan ateş toqtatuvı, Putinge "Ukrayinağa nisbeten maqsatları açıq olğanı içün, beklemek ve kene qaytmaq" imkânını bereceginden qorqqanını bildirdi.
Starmer, Frenkistan prezidenti Emmanuel Makron ve Tramp körüşken soñ ABD paytahtına yol aldı.
Makronnen beraber jurnalistler ögünde çıqışta bulunıp, ABD prezidenti Rusiye-Ukrayina cenki bir qaç afta içinde bitecegine ümüt etkenini bildirdi. O, şunı da qayd etti ki, ziddiyetniñ daa da kerginleşmesine ve Üçünci cian cenkiniñ başlanmasına yol bermek istemey.
Prezident Donald Tramp kiçik aynıñ 26-nda ABD Ukrayinağa çoq telükesizlik kefaletlerini bermeycek, bunı Avropa yapmaq kerek, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
