Ukrainanıñ şimdiki prezidenti ve devlet yolbaşçısı saylavlarında namzet olğan Petro Poroşenko raqibi, birinci tur ğalibi Volodımır Zelenskıy ile, qanunda diger qaideler olsa da, stadionda munaqaşağa azır olğanını bildirdi.
«Munaqaşa stadionda temaşa olsun dep yapılmay, munaqaşa – memleketniñ inkişaf strategiyası, qıymet, tarihiy vektor, prioritetler aqqında ciddiy bir subet… Munaqaşa qaideleri prezident saylavları qanunında yazılğan, oquñız, lütfen. O, tek Cemaat televideniyesinde yapılıp, on millionlarnen insan içün bütün telekanallarda yayınlana bile… Amma stadion deseñiz, stadion olsun. Bekleyim, Volodımır Oleksandrovıç», – dedi Poroşenko aprelniñ 4-ne keçer gecesi içtimaiy ağlarda aydınlatılğan video muracaatında.
Zelenskıy Poroşenkonı Kyivdeki «Olimpiyskıy» milliy sport kompleksinde munaqaşada iştirak etmesine çağırdı.
Stadionnıñ matbuat hızmeti prezident namzetlerinden munaqaşa keçirilüvi içün muracaat almağanını bildirdi.
Ukraina Merkeziy saylav komissiyası Aprelniñ 4-nde memleket prezidenti saylavlarınıñ birinci tur protokollarınıñ 100%-ını teşkerdi. Volodımır Zelenskıy ğalip çıqtı, ekinci yerde – şimdiki prezident Petro Poroşenko.
Saylayıcılarnıñ 30,24%-ı (5 mln 713 biñ 825 insan) Zelenskıyge qoltuttı. 3 mln 14 biñ 523 insan (15,95%) Poroşenkoğa rey berdi. Üçünci yerde Yuliya Tımoşenko – 2 mln 523 biñ 230 insan (13,40%).
Umumen saylavlarda 18 mln 893 biñ 879 insan iştirak etti. Bülletenlerniñ 1,18%-ı qabul etilmedi.
Hatırlatamız, Ukrainanıñ şimdiki prezidenti Petro Poroşenko devlet yolbaşçısı saylavlarında çetel saylav okrugında ğalip çıqtı. Bunı bu okrugda protokollarnıñ 100%-ını teşkergen Ukraina Merkeziy saylav komissiyasınıñ malümatları tasdıqlay.
Poroşenko saylayıcılarnıñ 38,93%-ını qazandı. Ekinci yerde – oyuncı ve alıp barıcı Volodımır Zelenskıy – 26,01%. Üçünci yerde – «Grajdanskaya pozitsiya» firqasınıñ lideri Anatoliy Ğrıtsenko kele, oña 10,64% rey berildi.
Ukrainada martnıñ 31-nde prezident saylavları olıp keçti. Saylayıcılarnıñ 63,5%-ı rey berdi.
Milliy exit poll malümatına köre, Volodımır Zelenskıy 30,6%, Petro Poroşenko – 17,8%, Yuliya Tımoşenko – 14,2%, Yuriy Boyko – 9,7%, Anatoliy Grıtsenko – 7,1%, Aleksandr Şevçenko – 0,5% qazandı.
Merkeziy saylav komissiyası saylavlarnıñ soñki neticelerini aprelniñ 10-na qadar ilân etmeli. Ekinci tur aprelniñ 21-nde olacaq.
