Rusiye akimiyeti tarafından Aqmescit SİZO-sında tutulğan qırımtatar faali ve Qırımtatar Milliy Meclisi reisiniñ muavini Nariman Celâl Ukrayina reberligini Rusiye ile aytışmalar vaqtında "Ukrayinanıñ telükesizligi yalıñız onıñ suverenitetiñ tam şekilden ğayrıdan tiklenmesi ile temin etilecegini" köz ögünde tutmağa çağırdı.
"Ukrayinadaki vaziyet ve arbiy çatışmanıñ çezilmesi ile bağlı aytışmalar kereklidir. Taraflarnıñ pozitsiyaları vaziyetke köre deñişecegi aydındır. Aynı zamanda, men Ukrayina reberligini, şahsen Prezidentni, devletimizniñ telükesizligi yalıñız onıñ topraq bütünliginiñ ve Anayasağa köre bütün Ukrayina topraqları üzerinde suverenitetniñ ğayrıdan tiklenmesi ile kerekli seviyede temin olacağını unutmamağa çağıram. Söz yalıñız topraqlar aqqında degil, aynı zamanda adamlar aqqında da olğanını ununtmayıq. Er bir yıl tecavuzcığa yardım ete bilir ve ğayrıdan tiklenüv devrini daa ziyade qıyın yapa bilir", - dep yazıla Celâlnıñ advokat Nikolay Polozovnen berip yibergen beyanatında.
Rusiye kontrolindeki Qırım Yuqarı mahkemesi qırımtatar siyasetçisi ve faal Nariman Celâl ve ağa-qardaş Aziz ve Asan Ahtemovlarnıñ apiste qaluv müddetini 2022 senesi iyülniñ 26-na qadar uzattı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
