Ukraina prezidentiniñ Qırım Muhtar Cumhuriyetindeki temsilciligi, işğal etilgen Qırımda Rusiye mahsus müessiseleri tarafından Azatlıq Radiosınıñ ştattan tış hadimi (Qırım.Aqiqat leyhası) Vladislav Yesipenkonıñ tutulmasını «qararlı bir şekilde takbih ete», dep bildirdi.
«Rusiye Federatsiyası, dünyanıñ vaqtınca işğal etilgen Qırım Muhtar Cumhuriyeti ve Aqyar şeeri aqqında alacaq yekâne malümatı Rusiye propagandası olsun dep, söz serbestligini sıñırlay, jurnalist, bloger ve atta içtimaiy ağlarnıñ adiy qullanıcılarını taqip ete, böylece sovetlerniñ siyasetini tekrarlay. Rusiyeniñ hayalindeki dünyada insan aqlarına ve tamır qırımtatar halqınıñ aqlarına, ukrain tili ve medeniyetine, mustaqil jurnalistikağa yer yoq», – dep aytıla temsilcilikniñ izaatında.
Müessise, «yarımadada er bir qanunsız taqipni qayd ete, uquq qoruyıcı organlarına bildire ve halqara ortaqlarınen bağ tuta», dep qayd etti.
«Vaqtınca işğal etilgen topraqta jurnalist faaliyeti içün Vladislav Yesipenkonıñ taqip etilüvi halqara uquq normalarınıñ bozuluvı ola», – dep qoştı temsilcilik.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi.
FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken. Kreml kontrolindeki mahkeme Yesipenkonı mayısnıñ 11-ne qadar apiste qaldırdı.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Vladislav Yesipenkonıñ tutuluvı ve apiske alınması sebebinden cinaiy tahqiqat başlattı, dep bildirdi.
Ukraina Tış işler nazirligi Qırımda tutulğan Vladislav Yesipenkonen mustaqil advokatnı körüştirmege talap ete.
