Soñki eki afta devamında Qırımda Rusiye ordusınıñ obyektlerine ücüm etilmeden sadece eki kün keçti, dep bildirdiler "QırımSOS" uquq qoruyıcı teşkilâtında.
"2023 senesinden başlap Qırımda patlav sesleri ile eñ az 19 kün keçti, iyülniñ 17-nden başlap ise aman-aman er kün patlav sesleri yüz bere. Soñki eki afta devamında işğal etilgen yarımadada darbesiz ya da "Ava mudafaası işi" olmadan episi olıp eki kün keçti", - dep bildirdiler teşkilâtta.
Haber vastalarınıñ malümatına köre, soñki patlav avgustnıñ 2-nde Sarabus qasabasında olğan.
İşğal etilgen Qırımğa muntazam olaraq ücümler ola. RF akimiyeti patlavlarda Ukrayina ordusını qabaatlay ya da buña talimler dey.
Ukrayina Milliy telükesizlik ve mudafaa şurasınıñ kâtibi Oleksiy Danılov Ukrayina telükesizlik hızmetiniñ (SBU - UTH) Keriç köpründeki patlavlarğa alâqasını tasdıqladı.
İyülniñ 17-nde saba Qırımnıñ Rusiye yolbaşçısı Sergey Aksönov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaq fevqulâde adise oldı.
Ukrayina Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayina Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o.
RBK-Ukrayına menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
