Martnıñ 21-niñ yarı gecesine yaqın dünyada COVID-19 koronavirus yuqunçına oğrağan 305010 insan resmiy şekilde qayd etildi. Bir kün içinde 1607 insan can berdi, dep bildire Azatlıq Radiosı.
ABDde er bir amerikalı areket sıñırlanuvına riayet etmeli ve sert karantinge uymalı, dep bildirdi memleketniñ prezidenti Donald Trump martnıñ 21-nde jurnalistlernen körüşip. Onıñ aytqanına köre, ABD iqtisadiyatına devlet yardımı olaraq 1 trillion dollar kelir dep beklemek mümkün – bunıñ sebebi tarqalğan qırğınlıqnıñ zararları oldı. Martnıñ 21-nde Kongress ve memuriyet vekilleri iqtisadiyatqa 1 trillion dollardan çoq para berüv aqqında qanun leyhasını muzakere etmege devam etti.
Bugünge qadar keçirilgen koronavirus testleri neticesinde – 195000 amerikalı iştirak etti – 19343 hasta tapıldı. Prezident muavini Mike Penceniñ aytqanına köre, okrug hastahaneleri ve memleketniñ tibbiy laboratoriya malümatı sayılmay.
Bazı kütleviy haber vastaları ABDde hastalanğanlarnıñ sayısı 21 biñni aştı, dep bildire.
Almaniyada yuqunç hastalıqlarını tedqiq etken Robert Koh İnstitutı martnıñ 21-nde Almaniyada hastalanğanlar aqqında yañı malümatnı derc etti: 16662 insan hastalandı, bir kün evelsi olarnıñ sayısı 2700 az edi. Közetüv devamında 46 insan koronavirustan öldi. «Alman dalğası» Baltimoredeki Johns Hopkins Universiteti derc etken diger malümatnı da aydınlata: martnıñ 21-nde aqşam Almaniyada 21828 hasta ve 75 ölü bar edi. Maqale müellifleri, Robert Koh İnstitutı federal topraqlardan kelgen esaplarnı alıp, malümatnı künde bir kere yañartqanı içün raqam farqı bar, dep diqqat celp ete.
Heinsberg rayonında (North Rhine – Westphalia), Reuters agentliginiñ malümatına köre, bündesver askerleri eali arasında üç biñ FFP2 maska-respiratorını, 15000 tibbiy maskanı, 8000 taqım urba tarqattı.
Frenkistanda bir kün içinde tahminen eki biñ koronavirus hastası qayd etildi.
Cumaertesi künü, martnıñ 21-nde, qırğınlıq başlağanından berli 562 insan can berdi. Soñki kün devamında 112 kişi öldi. Frenkistanda hastalanğanlarnıñ umumiy sayısı 14,5 biñ oldı.
«Vaziyet pek tez ileriley, ve tezden umumiy qırğınlıqqa rastkelecekmiz», – dep tenbiyeley Frenkistan Sağlıq nazirligi.
Öz menbalarına esaslanğan BFM-TV telekanalınıñ malümatına köre, politsiya ve jandarma 870 biñ insannıñ soqaqqa çıqmaq içün berilgen mahsus iznini teşkerdi.
Kontrol vaqtında nizam bekçileri şahsiyet şeadetnamesini ve mahsus izinni köstermege rica ete. Soqaqqa çıqqan er kes areket etkeniniñ sebebini añlatmalı. Akimiyet tek yaşağan yerine yaqın (eñ çoq 1-2 kilometr) sport içün, ilk ihtiyac mallarını satın almaq, ekimge barmaq, yaqınlarına yardım etmek ve işke ketmek içün çıqmağa ruhset bere.
RFI bildirgenine köre, karantin rejimini bozğanlarnı 135 eurodan 375 euroğa qadar para cezaları bekley.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
