Soçideki umumiy yurisdiktsiya üçünci istinaf mahkemesi advokat Nikolay Polozovnıñ Rusiye tahqiqatı Rusiye Ceza kodeksiniñ bir qaç maddesine istinaden qabaatlağan ve ğıyabiy şekilde mahküm etken Qırımtatar Milliy Meclisiniñ reisi Refat Çubarovnı imaye etmege izin berilmegenine qarşı bergen şikâyetini baqacaq.
Polozovnıñ bildirgenine köre, Rusiye kontrolindeki Qırım Yuqarı mahkemesi oña Çubarovnıñ imayesini yapmağa berilmegen iznine qarşı şikâyetini bir qaç kere blok etken edi.
«Ve endi yañı (dördünci) şikâyetni, birinci mahkemeniñ qarşılığına baqmadan, istinaf mahkemesine yollap oldıq», – dep yazdı Polozov.
Onıñ aytqanına köre, mahkeme oturışuvı Umumiy yurisdiktsiya Üçünci istinaf mahkemesinde (Soçi) noyabrniñ 24-nde saat 14:00-da olacaq.
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Çubarovnıñ tayin etilgen advokatı Aleksandr Osokin Qırımda ğıyabiy şekilde mahküm etilgen Qırımtatar Milliy Meclisiniñ reisi olmağan mahkemeni şikâyet etti.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
