O, Smolenskte ava mudafaası çalışqanını aytıp, yerli sakinlerni «açıq yerlerde olmamağa» çağırdı. Resmiy yerli akimiyet organları regiondaki ücümler aqqında bildirmey. Rusiye Telegram kanalları yazğanına köre, dronlarnıñ nişanı Smolensk aviatsiya zavodı olğandır. Shot kanalı «Yartsevo» cermay zavodına ücüm aqqında bildire.
Muarririyet bu haberlerni mustaqil menbalarda teşkerip olamay. Ukrayina komandanlığı bunı izaatlamadı.
Yanvarniñ 20-nde aqşam Voronej vilâyetiniñ Liski şeerinde Rusiyeniñ «Rosneft» devlet şirketiniñ cermay bazasına dronlar kene de ücüm etti. Bunı vilâyet valisi Aleksandr Gusev de tasdıqladı.
O, bir qaç dron ava mudafaa vastalarını urıp tüşürdi, dep ayttı - olardan birisi neft anbarı territoriyasına tüşti, ve bu yanğınğa sebep oldı. Qurbanlar aqqında haberler yoq.
Bundan evel yanvarniñ 15-den 16-na keçer gecesi Liskideki cermay bazası endi ücüm etildi. O vaqıt Voronej vilâyetiniñ Liski rayonında cermay anbarında devam etken yanğın sebebinden felâketli vaziyet ilân etilgen edi.
Soñra Ukrayina Silâlı Quvetleriniñ Baş ştabı Liski şeerindeki «Rosneft» bazasına dronlarnıñ ücümini tasdıqladı. Maruzada qayd etildi ki, bu cermay bazası Ukrayinağa qarşı cenk alıp barğan ordu gruppasını yaqıtnen teminley.
Rusiyeniñ Ukrayinağa qarşı büyük ücümi başlanğanından berli Rusiye regionları muntazam sürette ateş ve dronlarnıñ ücümlerine oğray. Rusiyeniñ Mudafaa nazirligi Rusiyede raketalar ve dronlarnıñ tüşürilmesi aqqında haber ete. Kyiv bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.