Rusiyege qoltutqan faal, sahte Qırım milletlerara missiyasınıñ reisi Zaur Smirnov «beklegenlerni» qanun seviyesinde belgilep, Ukrayinağa qoltutqan vatandaşlarnı yarımadadan quvmağa teklif etti.
İşğal etilgen Qırımnıñ Rusiye akimiyeti Ukrayina ordusı ve akimiyetiniñ kelmesini istegenlerni «beklegen» dep adlandıra. Smirnovnıñ fikirince, böyle bir añlam olsa, «devlet içün telükeli olğan bu şeynen» daa semereli küreş olur.
«Memuriy ve cinaiy taqipten ğayrı, beklegenlerniñ Rusiye vatandaşlığını almaq ve, belki de, memleketten quvmaq kerek», – dep ayttı Smirnov «RİA Novosti» agentligine.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
