Slovakiya baş naziri Robert Fitso suiqastqa oğradı, al-azırda hastahanege alındı, dep haber ete Denník N gazetası.
Denník N mühbiri adise yerine yaqın edi. O, suiqastnı körmedi, amma ateş seslerini eşitti. Soñra qaravulnıñ baş nazirni yerden kötergenini, maşinağa mindirip alıp ketkenlerini kördi. Pravda şübheli ateş açmazdan evel qıçırdı, dep yaza.
Şaatlar aytqanına köre, Fitsoğa ateş açılmazdan evel onı selâmlağan insanlarnıñ yanına bardı. Şübheli adise yerinde polis tarafından tutuldı. Berilgen malümatqa köre, baş nazirniñ alı ağır, eki-üç qurşun ola bile.
Suiqasttan soñ Slovakiya parlamentiniñ oturışuvı toqtatıldı.
Fitso oktâbr ayında «Kurs – slovak sotsial-demokratiya» populist firqası ğalebe qazanğan soñ ükümet yolbaşçısı olaraq tayin etilgen edi. Firqanıñ Avropaskeptik ve milletçi baqışları bar, saylavlardan evel Ukrayınağa arbiy yardımnıñ sıñırlanmasına ve migratsion kontrolniñ sertleştirilüvine qoltutqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
