Slovakiya Ukrayinağa silâ endi bermeycek, dep bildirdi Slovakiya tış işler naziri Yuray Blanar.
Slovakiya naziri qayd etti ki, onıñ memleketi Ukrayinağa arbiy malzemelerni öz ordusınıñ yedekleri esabından endi bermeycek, çünki, onıñ fikrince, "oña artıq para yoq".
Amma, nazirniñ aytqanına köre, Slovakiya "ukrayin ordusına yardım etmek içün başqa bir yol taptı". Blanar dey ki, memleket Mihalovtsada ukrayin arbiy tehnikası içün tamir bazasını keñleştirmek istey.
O şunı da añlattı ki, "bu, tehnika tamirini maliye etecek Almaniya ile beraberlikte yapılacaq iş, Slovakiya ise binalarnı berecek".
Daa evel belli olğanı kibi, Bratislava Ukrayinağa Rusiye tecavuzından qorçalavnıñ ölümge yol bermeycek vastalarını, şu cümleden minalardan qorçalav tehnikasınıñ berilmesini toqtatmaycaq.
Oktâbrniñ 7-nde Ukrayina ve Slovakiya ükümetleri ekinci ükümetlerara mesleatlarnı keçirdiler. Körüşüv Ujgorod şeerinde olıp keçti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
