Slovakiya ükümeti Ukrayinağa qış gumanitar yardım paketini bermege qarar aldı. İç işler nazirliginiñ bildirgenine köre, yardımnıñ umumiy miqdarı 203 492 yevro olacaq.
Gumanitar yardım paketine qızdıruv cihazları, elektrik stantsiyaları, urba ve ilâc qutuları, aşayt malları ve içme suvu kirsetilecek. Ukrayinağa gumanitar yardımnı Slovakiya İç işler nazirligi ve Tış işler nazirligi temin ete edi.
"Buhran er bir memleketke tesir ete bile, ve memleketlerara birdemlik global meselelerniñ çezilüvinde esas element ola bile", - dep aytıla Slovakiya Tış işler nazirliginiñ beyanatında.
Slovakiyadan Ukrayinağa yardımnı Avropa komissiyasınıñ yardımı ile naqliyat ağı alıp ketecek.
2023 senesi oktâbr ayında Slovakiya ükümetine dörtünci kere Robert Fitsonı yolbaşçılıq etti, o, Ukrayinağa arbiy yardım kösterilmesine qoltutmaycağını bildirdi.
Slovakiya mudafaa naziri Robert Kalınak noyabrniñ 14-nde NATO baş kâtibine Slovakiya yedeklerinden Ukrayinağa arbiy yardımnıñ toqtatılması aqqında haber etti. Amma, onıñ aytqanına köre, Slovakiya "eñ keniş gumanitar, grajdan ve tehnikiy yardımnı" teklif ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
