Büyük Britaniyada sabıq rusiye hafiye Sergey Skripal ve qızı Yuliyanıñ zeerlenüvi sebebinden, AQŞ-nıñ Rusiyege qarşı kirsetken ekinci sanktsiyalar paketi qanuniy quvetini aldı. Böyle vesiqa devletniñ Federal sicil saytında derc etilgen, dep bildire Radio Svoboda.
Yañı sanktsiyalarğa köre, Amerika Qoşma Ştatları, Halqara valüta fondu, Dünya bankı ve başqa halqara maaliye teşkilâtlarına Rusiyege maaliyeviy-tehnik yardım ve kredit berilmesini yasaqlay. Bundan ğayrı, AQŞ, rusiyelilerge bir sıra tehnologiyalar ve mallar satışı vaqtında litsenziya talaplarını arttırmağa niyetlene. Em de Amerika banklarına Rusiyege kreditler bermege ve Rusiye devlet borcunıñ bazarında iştirak etmege, yani rusiye valüta obligatsiyalarını satın almağa yasaq etile.
Skripallerniñ zeerlenüvi içün Rusiyege qarşı sanktsiyalarnıñ kirsetilecegi avgustnıñ başında belli oldı. Olar, eñ azından, bir yıl ükümsürecegi de bildirile edi.
Rusiyege qarşı yañı AQŞ sanktsiyaları avgustnıñ 22-sinde quvetini alacaq. Sıñırlavlar Büyük Britaniyada Solsberi (Salisbury) şeerinde rusiye hafiyeliginiñ agenti Sergey Skripal ve oñıñ qızı Yuliya Skripalniñ zeerlengeninen bağlı. Vaşıngton bildire ki, Rusiyeniñ Büyük Britaniyada “Noviçök” zeerlegen maddeni qullanğanı halqara uquqnı boza.
Yañı sanktsiyalar aviatsiyada qullanılğan elektron cihazlarnıñ Rusiyege ihracını yasaqlay, “Aeroflot”qa ise AQŞ-na uçuşlarnıñ yasaqlanması mümkün.
