Martnıñ 11-inde Amsterdamda “skit altını”nıñ ukrain devletine qaytarılması mahkeme qararına, Qırım müzeyleriniñ nevbetteki apellâtsiyası olacaq. Bu aqta fevral 27-sinde “İşğal etilgen Qırım: tirenüvniñ 5 yıllığı” halqara forumında Ukraina medeniye naziri Yevğen Nişçük bildirdi, dep haber ete Qırım.Aqiqat mühbiri.
“On künden, yani martnıñ 11-inde men ve işdeşlerim Amsterdamğa, nevbetteki apellâtsiya mahkemesine ketecekmiz. Amma, elbette ki, Rusiye, bayağı küç sarf etip, büyük mahkeme davasını azırlay. Bu endi eki yılğa sürdi. Martnıñ 11-inde, ümüt etem ki, nasıldır aydınlıq peyda olur ve bu dava ne vaqıt bitecegini añlarmız”, - dedi Nişçük.
Amsterdamnıñ bölge mahkemesi dekabr 14-de «skit altınları» kollektsiyasınıñ Ukrainağa qaytarılmasına dair qarar çıqardı. «Qırım – Qara deñizniñ altını ve sırı» sergisi 2014 senesi fevral ayından avgust ayına qadar Amsterdamnıñ Allard Pirson müzeyinde numayış etilgen edi. Anda Qırımdaki skit, sarmat ve gotlarnıñ medeniyetini temsil etken dört Qırım müzeyiniñ eksponatları taqdim etilgen edi.
Qırım işğalinden soñ Ukraina akimiyeti eserler müzeyge degil de, Ukraina devletine ait, dep bildirdi. Qırım müzeyleri ise eksponatlarnıñ olarğa qaytarılmasını talap ettiler. Felemenk müzeyi eserlerni ne Ukrainağa, ne de Qırımğa bermedi ve mahkeme qararını ya da taraflarnıñ añlaşmasını beklegen edi.
Qırımnıñ dört müzeyi Amsterdam mahkemesinde Allard Pirson müzeyine qarşı dava açtırıp, kollektsiyanı Qırımğa qaytarmağa talap etken edi.
