Rusiye tarafından 17 yılğa mahküm etilgen «qırımlı musulmanlar davasınıñ» soqur mabüsi Aleksandr Sizikov Rusiyeniñ Krasnoyarsk ülkesindeki Minusinsk şeeriniñ apishanesine ketirildi. Etap eki ay devam etti, dep bildire «Qırım birdemligi» qırımlınıñ anası Yelena Sizikovanıñ malümatına esaslanıp.
Jurnalistlerniñ elinde olğan fevralniñ 24-ndeki mektüpte Sizikov koloniyağa onı fevralniñ 8-nde ketirgenlerini, etap ise eki ay devam etkenini bildirdi.
Al-azırda o, dört diger mabüsnen «karantin» kamerada buluna.
Koloniyağa kelgen soñ erkek saba meşğuliyetlerinden boşaltıldı, töşek rejimi ve mahsus diyetası belgilendi.
«Umumen, Allahqa şükür, er şey yahşı… Kameradaki araret orta: ne suvuq, ne sıcaq. Mında kelgen soñ bütün eşyalarımnı alğanlar, tek gigiyeva vastaları, yazuv malları, Brayl urufatınen kitap ve satranç qaldı. Ekimlerden mahsus izin ketirgenler – kamerağa tayaq, tonometr ve ilâclarnıñ bir qısmını almağa izin bergenler. İlâclar bitkende başqalarını bereler», – dep qayd etti Sizikov.
Sizikovnıñ aytqanına köre, tibbiy teşkerüvden soñ onı koloniyadaki hastahanege yollamaq kerekler, anda er kün alacaq arterial gipertenziya ilâcları berilmeli. Lâkin bu ne vaqıt olacaq – şimdilik belli degil.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
