Ukraina Tış işler naziri Dmıtro Kuleba Rusiyede ATR telekanalınıñ baş müdir muavini, jurnalist Ayder Mujdabayevge qarşı açılğan davanı «siyasiy taqip» dep adlandırdı.
«Ayder Mujdabayevniñ siyasiy taqip etilüvi Rusiyeniñ siyasiy sebeplerden terror ile küreş qanunlarını suistimal etmege devam etkenini köstere. Bu halqara toplulıqnıñ terror ile küreş ğayretlerini boza ve aletlerini itibardan tüşüre», – dep yazdı Kuleba Twitterde.
Mayısnıñ 22-nde ATR qırımtatar telekanalınıñ baş müdir muavini Ayder Mujdabayevniñ Twitterde bildirgenine köre, Rusiyede oña qarşı «terror faaliyetine açıq çağıruv, terrorizmni açıq aqlav ya da terrorizm propagandası» maddesine istinaden cinaiy dava açıldı.
Mujdabayevniñ aytqanına köre, cinaiy dava Facebookta «Sentsovnı qurtarmaq» kerek olğanına dair yazğanları sebebinden açıldı. Jurnalistniñ qayd etkenine köre, qararda «onıñ Rusiye casuslarını tutıp, avtomat qoymağa ve Putinden Sentsovnı olarğa deñiştirmesini talap etmege çağırğanı» aytıla.
Rusiye Tahqiqat komiteti Mujdabayevge qarşı dava aqqında malümatnı açıq şekilde izaatlamay.
