Rusiye işğal etken Qırımnıñ İçki rayonınıñ Sollar (Mitrofanovka) köyünde yerli sakinler siyasiy mabüslerge mektüp yazuv aqşamını keçirdi. Aktsiya oktâbrniñ 15-nde apiske alınğan dört qırımlığa qoltutmaq içün keçirildi: Fevziye Osmanova, Elviza Aliyeva, Nasibe Saidova ve Esma Nimetulayevağa.
“Qırım birdemligi” haber etkenine köre, tedbir teşebbüsçileri mektüplerni apiske alınğanlarnen yekâne bağ imkânı dep saya.
“Olarğa bu şekilde qoltutmağa isteymiz. Mektüpler – qaçırılmaycaq bağ imkânımızdır. Halq olarnı qaldırmaycaq ve er vaqıt yardım etecek. Olarnı, sağlıqlarını ve allarını qasevetlenemiz. Ümüt etemiz ki, yaqın vaqıtta olar qorantalarına qaytacaqlar”, – dep izaatları tedbir musafiri Zera Paralamova.
Qırımda çoqusı qırımtatarlar olğan ve siyasiy sebeplerden taqip etilgen siyasiy mabüslerge qoltutuv aktsiyaları muntazam sürette keçe.
Oktâbrniñ 16-nda Rusiye kontrolindeki Aqmescitniñ Kiyev rayon mahkemesi dördüni de eki ayğa SİZOğa yolladı.
Oktâbrniñ 28-nde haber etilgenine köre, Qırımda Rusiye uquq qoruyıcıları tarafından tutulğan Elviza Aliyeva, Nasibe Saidova ve Fevziye Osmanovanıñ analarına apiste tutulğan qızlarına bir şey yollamağa izin berilmedi.
Oktâbrniñ 29-nda Rusiye kontrolindeki Qırım Yuqarı mahkemesi beş bala anası Esma Nimetulayeva, terbiyeci Nasibe Saidova, student Elviza Aliyeva ve iş adamı Fevziye Osmanovanıñ advokatlarınıñ istinaf şikâyetlerini red etip, qırımlılarnı apiste qaldırdı.
Aq qorçalayıcılar qayd etkenine köre, Qırımda qırımtatar qadın-qızlarına qarşı açılğan ilk Hizb ut-Tahrir davası oldı.
“Hizb-ut-Tahrir" teşkilâtı Rusiyede terror teşkilâtı olaraq tanıla, lâkin bir çoq memlekette yasaqlanmay.
