Eñ az 36 qırımlı siyasiy mabüs acele tibbiy yardımğa muhtac, dep bildirdi Qırım Muhtar Cumhuriyeti ve Aqyar sakinleri aqlarınıñ vekâletli vekili Elvin Kadırov.
«Vekâletli vekili apishanelerde repressiyalarnıñ devam etkenini ve tibbiy yardım kösterilmegenini qayd etti, halqara uquq bunı işkence dep saya. Bu sebepten eki qırımlı siyasiy mabüs elâk oldı ve eñ az 36 siyasiy mabüs acele tibbiy yardımğa muhtac», – dep aytıla Ukrayına Yuqarı Radasınıñ insan aqları vekâletlisiniñ matbuat hızmeti derc etken haberde.
Kadırovnıñ aytqanına köre, eñ az 208 Ukrayına vatandaşı siyasiy ve/ya da diniy sebepli cinaiy taqipler sebebinden apishanelerde tutula, olardan 125-i – qırımtatarıdır.
Ukrayına ombudsmeniniñ vekili halqara toplulıq bütün siyasiy mabüslerniñ azat etilüvi içün Rusiyege basqıda ğayretlerini birleştirmeli, dep diqqat etti.
Ukrayına prezidentiniñ Qırım Muhtar Cumhuriyetindeki temsilcilik malümatına köre, 2024 senesi fevralniñ 19-nda Rusiye 208 qırımlı siyasiy mabüsni apiste tuta, 125-i qırımtatarı ola.
Qırımtatar Resurs Merkeziniñ yolbaşçısı Eskender Bariyev bildirdi ki, 2023 senesi Qırımda uquq qoruyıcılar 173 yaqalanuv, 65 tintüv, 217 tevqif, 186 sorğu, em de adaletli mahkeme aqqınıñ ve 50-den ziyade sağlıq aqqınıñ bozuluvı ile bağlı aman-aman 300 adise qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
