2023 senesiniñ başından Qırımda siyasiy sebeplerden taqip etilgen eñ az 25 insan Rusiyege etap etildi, bu cenk cinayeti ola, dep bildirdi KrımSOS aq qorçalayıcı teşkilâtı.
Bundan evel KrımSOS 2023 senesiniñ başından Rusiye apishanelerine etap etilgen 14 insannıñ adlarını derc etti. Sentâbrniñ 13-ne qadar daa 11 ad qoşuldı.
2023 senesi iyül ayında Aqmescitteki ekinci «Hizb ut-Tahrir davasınıñ» dört mabüsi Rusiyeniñ çeşit köşelerindeki apishanelerge qanunsız bir şekilde etap etilgen edi. Vladlen Abdulkadırov Lipetsk vilâyetiniñ apishanesine etap etildi, Tofik Abdulgaziyev Çelâbinsk vilâyetiniñ apishanesine, İzzet Abdullayev ve Raim Ayvazov Ulyanovsk vilâyetiniñ apishanesine etap etildi.
2023 senesi avgust ayında üç qırımlı siyasiy mabüs Rusiyege qanunsız bir şekilde etap etildi. Aqmescitteki ekinci «Hizb ut-Tahrir davasınıñ» daa bir mabüsi Bilâl Adilov Krasnoyarsk ülkesindeki apishanege etap etildi. Bağçasaraydaki üçünci «Hizb ut-Tahrir davasınıñ» mabüsi Amet Suleymanov Aqmescit SİZOsından Vladimir şeerine apishanege etap etildi.
Vatandaş jurnalisti İrına Danılovıç Aqmescit SİZOsından Stavropol ülkesindeki koloniyağa etap etildi.
2023 senesi sentâbr ayında dört qırımlı siyasiy mabüs Rusiye apishanelerine qanunsız bir şekilde etap etildi. Üçü – Novoçerkassk SİZOsında tutulğan Aqmescitteki ekinci «Hizb ut-Tahrir davasınıñ» mabüsleri. Akim Bekirov Saratov vilâyetindeki apishanege yollanıldı, Rustem Seythalilov – Ulyanovsk vilâyetiniñ apishanesine, Asan Yanikov – Vladimir vilâyetiniñ apishanesine.
Qarasuvbazardaki «Hizb ut-Tahrir davasınıñ» mabüsi Azamat Eyupov Çelâbinsk vilâyetiniñ Verhneuralsk şeerindeki apishanege etap etildi.
Teşkilâtnıñ hatırlatqanına köre, siyasiy mabüslernen beraber vatandaşlarnıñ Qırım yarımadasından Rusiyege etap etilüvi cenk cinayeti ola, çünki Jeneva şartnamesini boza.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
