«Qırımlı musulmanlar davasınıñ» mabüsi, siyasiy mabüs Muslim Aliyev yanvarniñ 23-nden berli Rusiyeniñ Salavat şeerindeki koloniyada ceza izolâtorında buluna. Bu aqta «Qırım birdemligi» aq qorçalayıcı birleşmesi haber ete.
«Yanvarniñ 23-nden berli ceza izolâtorını uzatalar. Endi 118 kün oldı. Kene iyünniñ 10-na qadar uzatqanlar. Sebep – iç nizamnıñ bozuluvı degil, formal bir şey», – dep tarif etti ömür arqadaşı Naciye Aci-Mamutova.
Aliyev 2020 senesi sentâbr ayında Başqortostandaki №2 tüzetüv koloniyasına etap etilgeninden berli muntazam sürette ceza izolâtorına qapatıla.
Kiçik bir kamera, mabüslerniñ areketleri sıñırlana. Tek saba beşten aqşam doquzğa qadar turmağa ya da oturmağa izin berile, küneş ve suniy ışıq yoq, dep qayd ete aq qorçalayıcılar.
«Şaraitleri işkencege yaqın olğan bir kamera», – dedi Aliyev apayına ceza izolâtorında.
Onıñ fikirince, onı «yuqarıdan kelgen bir emir» sebebinden cezalaylar. Advokat Edem Semedlâyev koloniya memuriyetiniñ areketlerini şikâyet etecek, dep bildirdi.
Moskva vilâyetindeki (Rusiye) Vlasiha şeeriniñ Arbiy istinaf mahkemesi 2020 senesi iyünniñ 25-nde Muslim Aliyev ve Yaltadaki «Hizb ut-Tahrir davasınıñ» daa beş mabüsiniñ ükmüni deñiştirmedi.
«Memorial» Rusiye aq qorçalayıcı merkezi Muslim Aliyevni siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
