Rusiye koloniyasına 20 yılğa apis etilgen ukrain rejissör Oleğ Sentsov, cumaertesi künü, iyül 13-ünde 43 yaşını tolduracaq. Bu, o koloniyada qutlağan altıncı doğğan künüdir. Şimdi Sentsov Rusiye şimalinde, Labıtnanga koloniyasında tutula.
Tünevin ukrain siyasiy mabüsini onıñ advokatı Dmitriy Dinze ziyaret etti, o, Sentsovnıñ alı bir coruq olğanı aqqında ve onıñ icadiy işi aqqında Facebookta qısqadan yazdı.
Cumaertesi künü Ukrainada ve başqa memleketlerde Oleg Sentsovğa bağışlanğa merasimler keçirilecek ola.
Demek, kündüz Kyivde, Rusiye zornen tutqan ukrain siyasiy mabüslerine bağışlanğan "Sentsov+" fleşmobı ve "Sıñırnıñ arqasında" performansı keçirilecek. 20:00 "Oleg Sentsov ile gece" merasimi başlanacaq.
"Bu kün 20:00 başlap ve gecege qadar biz, Olegnıñ metinlerinden parçalarnı oqucaqmız, Kreml mabüslerine bağışlanğan muzıkanı diñlecekmiz, olarğa mektüpler yazacaqmız ve vesiqalı filmlerni seyir etecekmiz", - dep ilân etti teşkilciler.
Odessa halqara kino festivalinde Oleg Sentsovnıñ "Nomerler" pyesasınıñ esasında çıqarılacaq filmniñ birinci treylerini kösterecekler.
Belarusta Minsk şeerinde "Santıraç mektüp" sergisi açılacaq, onda siyasiy mabüslerniñ mektüpleri, resimleri, elyapmaları numayış etilecek ve sabıq siyasiy mabüslerniñ muzakeresi olacaq.
