Rusiye koloniyasında apis etilgen Qırım anarhisti, siyasiy mabüs Oleksandr Kolçenkonıñ anası, oğlunen nevbetteki uzun körüşüv 2019 yılı küzde olacaq, dep ümüt ete. Bu aqta Larisa Kolçenko Qırım.Aqiqatqa bildire.
“Ögnece aytmacağım, amma endi küzde nevbetteki körüşmemiz olacaq, dep ümüt etem. Nasıl olacağını, arizanı ne vaqıt imzalacağını bilmeymiz. Saşa ariza yazmalı, onı koloniya müdiri imzalamalı ve böylece bu uzun körüşüvge razılıq bermeli”, - dep añlattı Kolçenko.
Apis etilgenniñ anası, oğlu bu körüşüvlerni pek bekley, dep ayta. O Ukrainadaki saylav kampaniyasınen meraqlana, amma Rusiye matbuatında bu malümatnı alıp olamay eken.
“Biz bir birimizni pek sağındıq. Körüşmege, laf etmege isteymiz, bu mektüp yazışması ya da telefon lafları degil de”, - dep qoştı o.
Larisa Kolçenko oğlunı aman-aman bir yıl körmedi. Keçken uzun körüşüv 2018 senesi iyül ayında edi.
